"ડિજિટલ ક્રાંતિ: હવે સરકાર અને સ્ટારલિંક સાથે મળીને કામ કરશે – ગાંધીનગરમાં થયા કરાર, જુઓ કોને થશે ફાયદો?

ગાંધીનગર: વડાપ્રધાન નરેન્દ્ર મોદીના 'વિકસિત ભારત 2047' ના સપનાને સાકાર કરવા ગુજરાત સરકારે એક મોટું પગલું ભર્યું છે. હવે વિશ્વના સૌથી ધનિક વ્યક્તિ એલોન મસ્ક (Elon Musk) ની કંપની 'સ્ટારલિંક' (Starlink) ગુજરાતના અંતરિયાળ ગામડાઓમાં સુપર-ફાસ્ટ ઇન્ટરનેટ પહોંચાડશે.

આજે ગાંધીનગર ખાતે મુખ્યમંત્રી ભૂપેન્દ્ર પટેલ અને ગૃહ રાજ્યમંત્રી હર્ષ સંઘવીની હાજરીમાં ગુજરાત સરકાર અને સ્ટારલિંક વચ્ચે 'લેટર ઓફ ઈન્ટેન્ટ' (LoI) પર હસ્તાક્ષર કરવામાં આવ્યા હતા.

કોને સૌથી વધુ ફાયદો થશે? (દાહોદ અને નર્મદા માટે ખાસ સમાચાર) આ પ્રોજેક્ટનો મુખ્ય ઉદ્દેશ્ય એવા વિસ્તારો છે જ્યાં મોબાઈલ ટાવરનું નેટવર્ક બરાબર પકડાતું નથી. સરકારના આયોજન મુજબ, પાયલોટ પ્રોજેક્ટ તરીકે સૌથી પહેલા આદિવાસી બહુલ જિલ્લાઓ પર ધ્યાન અપાશે:

• દાહોદ (Dahod)

• નર્મદા (Narmada) આ 'એસ્પિરેશનલ ડિસ્ટ્રીક્ટ' માં સેટેલાઇટ દ્વારા સીધું ઇન્ટરનેટ અપાશે, જેથી ત્યાંના વિદ્યાર્થીઓ અને વેપારીઓ દુનિયા સાથે જોડાઈ શકે.

શિક્ષણ અને આરોગ્યમાં થશે ક્રાંતિ: આ કરાર માત્ર ઇન્ટરનેટ માટે નથી, પણ ગામડાના વિકાસ માટે છે:

1. સ્માર્ટ સ્કૂલ: અંતરિયાળ ગામોની સરકારી શાળાઓને હાઈ-સ્પીડ નેટવર્કથી જોડાશે.

2. ટેલિ-મેડિસિન: પ્રાથમિક આરોગ્ય કેન્દ્રો (PHC) પર ડોક્ટરો ઓનલાઇન સારવાર આપી શકશે.

3. પોલીસ અને સુરક્ષા: જંગલ વિસ્તારમાં પોલીસ ચોકીઓ અને ડિઝાસ્ટર મેનેજમેન્ટને રિયલ ટાઈમ ડેટા મળશે.

ડિસેમ્બર 2025 ની મુલાકાતનું પરિણામ: યાદ અપાવી દઈએ કે, ગત ડિસેમ્બર ૨૦૨૫ માં મુખ્યમંત્રીએ સ્પેસએક્સના વાઈસ પ્રેસિડેન્ટ લોરેન ડ્રેયર સાથે મહત્વની બેઠક કરી હતી. આજના કરાર તે બેઠકનું જ પરિણામ છે. આ પ્રોજેક્ટ પર નજર રાખવા માટે હવે એક 'જોઈન્ટ વર્કિંગ ગ્રુપ' બનાવવામાં આવશે.

આ પ્રસંગે સ્ટારલિંક ઈન્ડિયાના વડા પ્રભાકર જયકુમાર અને ગુજરાતના ઉદ્યોગ કમિશનર પી. સ્વરૂપ દ્વારા કરારની આપ-લે કરવામાં આવી હતી.